El połastrèo de Santimaria

Chi l’avrebbe mai detto che un nostro cliente (ormai più che un amico) ci dedicasse una poesia in lingua veneta scritta di suo pugno per celebrare il nostro pollo col sughetto di pomodoro? Eccola qui di seguito i suoi versi in rima, è un onore per noi e vogliamo condividerla con tutti i nostri clienti

A cavało tra i ani sinquanta e sessanta,
nassèva a Boccón na roba squasi santa:
i sposèti Palmino e Bertilla, se inventava
un magnarèto gustoso da farghe la bava
che ciapàva el so nome come garansia:
nassèva cussì el połastrèo de Santimaria!
Ałora se sentàvino, da clienti senplicioni,
su dełe panchète co davanti dei tavołoni
e vedèvino poco più in là un gran fogolare
co streje de połastri su grełe a cuxinare
messe sora a bronse de legna incandìa
e chi ghe traficava gera i dò Santimaria!
Po’, co dei mèsi gera coti e ‘ncora de bójo,
la paròna ghe ne portava via un vassòjo
par strussiarghe – sconta – na speneładina
d’un sughèto novo, speciàe, roba soprafina,
che ghe daga un gusto fruto de maestrìa:
segreto del połastrèo co targa Santimaria!
Come aconpagnamento e portà a volontà,
bełe fetòne de połenta xala ‘pena brustolà;
pa’ contorno el menù gheva sclusivamente
sałata e qualche faxòło ma saltuariamente,
tipo a Nadàe e Pasqua, come na…regalìa:
regołe de fero vigeva in casa Santimaria!
E po’ tanto vinèo portà su dełe gran carafe
fruto dełe so vigne messe là fora più basse;
el gera de tipo modesto, però tuto naturàe,
che ndava xó de gusto in quantità industriàe
pa’ jutare la… discesa, in sinpatica alegria,
dea połenta, tocio e połastrèo de Santimaria!

Passà un fià de tenpo, no ricordo quanto,
i ghe ga xontà naltro prodòto da incanto:
i bìgoi fati col torcio, assicurava Palmino,
condìi co ragù o naltro sugheto genuino
inventà da so mujere co na bona fantasia
che entrava nea tradissión dei Santimaria!
E tuto questo, uguàe, ga durà ani e anori
afiancà ała vita co le so gioie e so dołori,
mentre canbiava el mondo, le ideologie,
i schei, le mode, tute chełe nove manie;
solo na roba restava identica-incandìa:
l’ormai famoso połastrèo de Santimaria!
Noaltri, co i tosi gera indrìo de proteine
o dei periodi i scarsejava de vitamine,
partìvino direti pa’i Coi e, de sgossón,
i se ne faxeva fora più de dò porsión!
Ghèvino trovà na bona frutuosa terapia
nei menù prescriti dal dotór Santimaria!
Sebèn che oramai i noni no sia più qua,
nel tenpo la so riceta no ga mai canbià;
solo ghe xe sta un positivo arichimento
co altre scelte e contorni a conplemento!
Comunque, anca se xe sta fata miliorìa,
xe sta intato el połastrèo de Santimaria!
Quindi, bravi so fiòi che no ga mai sgarà,
tegnendo el sucesso co na riceta inalterà!
Ma, a parte le capacità e ben poca lacuna,
xe anca el cognome che ga portà fortuna:
riciamando in sè Madòna, santi e così sia,
podèvea ‘ndargheła mae ai Santimaria?!

Pier Giorgio Fontana, marso 2014